കൊച്ചി ഇടപ്പള്ളിയിൽ ദാരുണമായ അപകടം: രണ്ട് വിദ്യാർത്ഥികൾ മരിച്ചു, രണ്ട് പേരുടെ നില ഗുരുതരം

കൊച്ചി: ഇടപ്പള്ളിയിൽ ഇന്ന് പുലർച്ചെയുണ്ടായ വാഹനാപകടത്തിൽ ആലപ്പുഴ സ്വദേശികളായ രണ്ട് വിദ്യാർത്ഥികൾക്ക് ദാരുണാന്ത്യം. നാലുപേർ സഞ്ചരിച്ച കാർ മെട്രോ റെയിലിന്റെ തൂണിൽ ഇടിച്ച് കയറിയാണ് അപകടമുണ്ടായത്. ഇന്ന് പുലർച്ചെ ഏതാണ്ട് 3:45 നാണ് സംഭവം. ആലപ്പുഴ സ്വദേശികളായ മുനീർ, അറൂബ് ഷാജി എന്നിവരാണ് മരിച്ചത്.

ഇടിയുടെ ആഘാതത്തിൽ ഗുരുതരമായി പരിക്കേറ്റ ഇവർ സംഭവസ്ഥലത്തുവെച്ചുതന്നെ മരണപ്പെടുകയായിരുന്നു. കാറിൽ ഒപ്പമുണ്ടായിരുന്ന മറ്റ് രണ്ടുപേരെ ഗുരുതര പരിക്കുകളോടെ ഉടൻതന്നെ ആശുപത്രിയിൽ പ്രവേശിപ്പിച്ചു. ഇവരുടെ നില അതീവ ഗുരുതരമായി തുടരുകയാണ്.
വിദ്യാർത്ഥികൾ സഞ്ചരിച്ച കാർ അമിത വേഗതയിലായിരുന്നു എന്നാണ് പ്രാഥമിക വിവരം. നിയന്ത്രണം നഷ്ടപ്പെട്ട കാർ മെട്രോ പില്ലറിൽ ശക്തമായി ഇടിക്കുകയായിരുന്നു. ഇടിയുടെ ആഘാതത്തിൽ കാർ പൂർണ്ണമായും തകരുകയും ചെയ്തു.

വിവരമറിഞ്ഞ ഉടൻതന്നെ പോലീസ് സ്ഥലത്തെത്തി മേൽനടപടികൾ സ്വീകരിച്ചു. അപകടത്തിൽ മരിച്ച വിദ്യാർത്ഥികളുടെ മൃതദേഹങ്ങൾ പോസ്റ്റ്‌മോർട്ടത്തിനായി ആശുപത്രി മോർച്ചറിയിലേക്ക് മാറ്റി. സംഭവത്തെക്കുറിച്ച് പോലീസ് വിശദമായ അന്വേഷണം ആരംഭിച്ചിട്ടുണ്ട്.