ചരിത്രം ആവർത്തിച്ച് ഐക്കരനാട്; ട്വന്റി20ക്ക് സമ്പൂർണ്ണ വിജയം, ഇക്കുറിയും പ്രതിപക്ഷമില്ല
ഐക്കരനാട് പഞ്ചായത്തിൽ ട്വന്റി20 പ്രസ്ഥാനം ഇത്തവണയും ചരിത്ര വിജയം ആവർത്തിച്ചു. പഞ്ചായത്തിലെ 16 വാർഡുകളിലും വോട്ടെണ്ണൽ പൂർത്തിയായപ്പോൾ മുഴുവൻ സീറ്റുകളും ട്വന്റി20 കരസ്ഥമാക്കി. ഇതോടെ കഴിഞ്ഞ ഭരണസമിതിയിലെന്നപോലെ ഇത്തവണയും ഐക്കരനാട് പഞ്ചായത്തിൽ പ്രതിപക്ഷമില്ലാത്ത ഭരണസമിതി നിലവിൽ വരും.
വാർഡ് 1 മുതൽ 16 വരെയുള്ള എല്ലാ സീറ്റുകളിലും എതിരില്ലാത്ത വിജയമാണ് ട്വന്റി20 നേടിയത്. യുഡിഎഫിനും എൽഡിഎഫിനും മറ്റ് സ്വതന്ത്ര സ്ഥാനാർത്ഥികൾക്കും ഒരൊറ്റ സീറ്റുപോലും നേടാനായില്ല. തങ്ങളുടെ വികസന അജണ്ടക്ക് ഐക്കരനാട്ടിലെ ജനങ്ങൾ നൽകിയ ഉറച്ച പിന്തുണയാണ് ഈ സമ്പൂർണ്ണ വിജയത്തിന് കാരണമെന്ന് ട്വന്റി20 നേതൃത്വം പ്രതികരിച്ചു.
ട്വന്റി20യുടെ ജനകീയ പ്രവർത്തനങ്ങൾക്കും സുതാര്യമായ ഭരണത്തിനും ലഭിച്ച അംഗീകാരമായാണ് ഈ വിജയത്തെ രാഷ്ട്രീയ നിരീക്ഷകർ വിലയിരുത്തുന്നത്. തിരഞ്ഞെടുപ്പ് പ്രഖ്യാപിച്ചതു മുതൽ ഐക്കരനാട് ഫലം എന്തായിരിക്കുമെന്ന ആകാംക്ഷയിലായിരുന്നു സംസ്ഥാനത്തെ രാഷ്ട്രീയ ലോകം. എന്നാൽ, എല്ലാ പ്രവചനങ്ങളെയും ശരിവെച്ചുകൊണ്ട് ട്വന്റി20 തങ്ങളുടെ ആധിപത്യം ഒരിക്കൽ കൂടി അരക്കെട്ടുറപ്പിച്ചു. പഞ്ചായത്തിലെ എല്ലാ വാർഡുകളിലെയും വോട്ടുകൾ എണ്ണിത്തീർന്നപ്പോൾ ആഘോഷത്തിമിർപ്പിലാണ് ട്വന്റി20 പ്രവർത്തകരും അനുഭാവികളും.
