ആസിഡ് ആക്രമണത്തിന് ഇരയായവരെ സന്ദര്‍ശിച്ച്‌ ബോളിവുഡ് സൂപ്പര്‍താരം ഷാരുഖ് ഖാന്‍.
ഐപിഎല്ലിലെ തന്റെ ടീമായ കൊല്‍ക്കത്ത നൈറ്റ് റൈഡേഴ്സും ബാംഗളൂര്‍ റോയല്‍ ചലഞ്ചേഴ്സുമായുള്ള മത്സരം കാണാനായാണ് താരം കൊല്‍ക്കത്തയില്‍ എത്തിയത്. മുംബൈയിലേക്ക് മടങ്ങുന്നതിനു മുന്‍പായാണ് താരം ആസിഡ് ആക്രമണത്തിന് ഇരയായവരെ സന്ദര്‍ശിച്ചത്.
ഇവരുമായി ഒരു മണിക്കൂറോളം കൂടിക്കാഴ്ച നടത്തിയ താരം അതിജീവിതര്‍ക്കായി ജോലിയും വാഗ്ദാനം ചെയ്തു. ഷാറുഖ് ഖാന്റെ എന്‍ജിഒ സംഘടനയായ മീര്‍ ഫൗണ്ടേഷന്‍ അംഗങ്ങളാണ് ഇവര്‍. താരത്തിന്റെ അച്ഛന്റെ പേരിലുള്ള സംഘടന സ്ത്രീകളുടെ ഉന്നമനത്തിനായാണ് പ്രധാനമായും പ്രവര്‍ത്തിക്കുന്നത്. ആസിഡ് ആക്രമണത്തിന് ഇരയായ സ്ത്രീകളും പുരുഷന്മാരും ഈ ഫൗണ്ടേഷനിലെ അംഗങ്ങളാണ്.
ഇവര്‍ക്കൊപ്പമുള്ള താരത്തിന്റെ ചിത്രങ്ങള്‍ സോഷ്യല്‍ മീഡിയയില്‍ വൈറലാവുകയാണ്. നിരവധി പേരാണ് താരത്തെ പ്രശംസിച്ചുകൊണ്ട് രംഗത്തെത്തിയത്.
