കോലഞ്ചേരി: ‘കോലഞ്ചേരി ടൗണിനെ പ്രകാശപൂരിതമാക്കി പി.വി.ശ്രീനിജിൻ എം.എൽ.എ.യുടെ ‘ദീപപ്രഭാ’ പദ്ധതി. ടൗണിലെ മുഴുവൻ തെരുവുവിളക്കുകളും മാറ്റി പുതിയത് സ്ഥാപിച്ചാണ് പദ്ധതി വഴി കോലഞ്ചേരി ടൗണിനെ പ്രകാശ പൂരിതമാക്കിയത്. ടൗണിലെ വടവുകോട് ബ്ലോക്ക് ഓഫീസ് ജംഗ്ഷൻ മുതൽ കിഴക്കേപമ്പ് ജംഗ്ഷൻ വരെയുള്ള റോഡിലും, മെഡിക്കൽ കോളജ് റോഡിലും, പ്രൈവറ്റ് ബസ് സ്റ്റാൻഡ് റോഡിലും, കോളേജ് ഗ്രൗണ്ട് റോഡിലും, പഴയ കെ.എസ്. ഇ.ബി റോഡിലും ഇരുവശങ്ങളിലായാണ് പുതിയവഴിവിളക്കുകൾ സ്ഥാപിച്ചത്. ഇതിനായി എം.എൽ.എ.യുടെ ആസ്തി വികസന ഫണ്ടിൽ നിന്നും 6.98 ലക്ഷം രൂപ ചെലവിട്ട് 40 വാട്സിൻ്റെ 110 എൽ.ഇ.ഡി. ലൈറ്റുകൾ സ്ഥാപിക്കുകയായിരുന്നു. കെല്ലിനായിരുന്നു ഇതിൻ്റെ സാങ്കേതിക ചുമതല.
ടൗണിൻ്റെ പല ഭാഗങ്ങളിലും വഴിവിളക്കുകൾ മിഴിയടച്ചിട്ട് നാളുകളേറെയായിരുന്നു.ഇത് മൂലം സാമൂഹ്യ വിരുദ്ധ ശല്യം വ്യാപകമാണെന്ന പരാതികളും ഉയർന്നിരുന്നു. ഇത് മാറ്റി പുതിയത് സ്ഥാപിക്കണമെന്ന് പ്രദേശത്തെ വ്യാപാരികളും നാട്ടുകാരും ആവശ്യപ്പെട്ടിരുന്നു.ഇതിനെ തുടർന്നാണ് എം.എൽ.എ.യുടെ നേതൃത്വത്തിൽ പദ്ധതി തയ്യാറാക്കി’ വഴി വിളക്കുകൾ സ്ഥാപിച്ചത്. പദ്ധതിയുടെ ഉദ്ഘാടനം പി.വി.ശ്രീനിജിൻ എം.എൽ.എ.നിർവഹിച്ചു. പൂതൃക്കപഞ്ചായത്ത് പ്രസിഡൻ്റ് ടി.പി.വർഗീസ് അധ്യക്ഷത വഹിച്ചു.വാർഡ് മെമ്പർമാരായ സംഗീത ഷൈൻ, ജിംസി മേരി വർഗീസ്,സി.കെ.വർഗീസ്, എം.എൻ മോഹനൻ,എം.എൻ അജിത്ത് തുടങ്ങിയവർ പ്രസംഗിച്ചു.വ്യാപാരി വ്യവസായി സമിതി, ഏകോപനസമിതി,കെ.എച്ച്.ആർ.എഎന്നിവരും പങ്കെടുത്തു.
