പ്രായപൂർത്തിയാകാത്ത പെൺകുട്ടിയെ പീഢിപ്പിച്ചു. യുവാവിന് 23 വർഷം കഠിന തടവും രണ്ടര ലക്ഷം രൂപ പിഴയും

പ്രായപൂർത്തിയാകാത്ത പെൺകുട്ടിയെ പീഢിപ്പിച്ച കേസിൽ 23 വർഷത്തെ കഠിന തടവും രണ്ടര ലക്ഷം രൂപയും ശിക്ഷ. പറവൂർ ചെറിയ പല്ലംതുരുത്ത് ഭാഗത്ത് നെടിയാറ വീട്ടിൽ സഞ്ജയ് ( 23 ) നെയാണ് ആലുവ ഫാസ്റ്റ് ട്രാക്ക് സ്പെഷ്യൽക്കോടതി ജഡ്ജി ഷിബു ഡാനിയൽ ശിക്ഷ വിധിച്ചത്.

വടക്കേക്കര പോലീസ് സ്റ്റേഷനിൽ രജിസ്റ്റർ ചെയ്ത കേസാണിത്. 2020 ൽ ആണ് സംഭവം നടന്നത്. ലഹരി വസ്തുക്കൾ ബലമായി നൽകിയാണ് പീഢനത്തിനിരയാക്കിയത്. എസ്.എച്ച്. ഒ ആയിരുന്ന എം.കെ മുരളിയാണ് അന്വേഷണം നടത്തി കുറ്റപത്രം സമർപ്പിച്ചത്.

എ.എസ്.ഐ രാജേഷും അന്വേഷണ സംഘത്തിലുണ്ടായിരുന്നു. പ്രോസിക്യൂഷന് വേണ്ടി സ്പെഷ്യൽ പബ്ലിക്ക് പ്രോസിക്യൂട്ടർ പി.ജി യമുന ഹാജരായി.