അരളി പൂവ് കഴിച്ചതായി സംശയം: കടയിരുപ്പ് ഗവ. ഹൈസ്കൂളിലെ രണ്ട് വിദ്യാർത്ഥികളെ ആശുപത്രിയിൽ പ്രവേശിപ്പിച്ചു
കോലഞ്ചേരി: അരളി പൂവ് കഴിച്ചതായി സംശയം കടയിരുപ്പ് ഗവ. ഹൈസ്കൂളിലെ രണ്ട് ഒമ്പതാം ക്ലാസ് വിദ്യാർത്ഥികളെ കോലഞ്ചേരി എം.ഒ.എസ്.സി മെഡിക്കൽ കോളേജിലെ ക്രിറ്റിക്കൽ ഐ.സി.യുവിൽ നിരീക്ഷണത്തിലാക്കി.
ഇന്ന് രാവിലെ ക്ലാസിൽ വച്ച് തലവേദനയും ഛർദ്ദിയും ഉണ്ടായതോടെ ഇരുവരേയും കടയിരുപ്പ് സി.എച്ച്.സിയിൽ എത്തിച്ച് നടത്തിയ പരിശോധനയിലാണ് വീട്ടിൽ നിന്നും വരുന്ന വഴി അരളി പൂവ് കഴിച്ചു എന്ന് ഡോക്ടർമാരോട് പറഞ്ഞത്. പ്രാഥമീക പരിശോധനയ്ക്ക് ശേഷം ഇവരെ എറണാകുളം ഗവ. ഹോസ്പിറ്റലിലേയ്ക്ക് റഫർ ചെയ്തു.
തുടർന്ന് രക്ഷിതാക്കളെത്തി തിരികെ കോലഞ്ചേരി മെഡിക്കൽ കോളേജിൽ പ്രവേശിപ്പിക്കുകയായിരുന്നു. പൂവ് കഴിച്ചതാണെങ്കിൽ പെട്ടെന്ന് പാർശ്വ ഫലങ്ങൾ അനുഭവപ്പെടില്ലെന്നാണ് ഡോക്ടർമാരുടെ വിലയിരുത്തൽ. രക്ത സാമ്പിളുകൾ വിദഗ്ദ പരിശോധയ്ക്ക് നൽകിയിട്ടുണ്ട്.
24 മണിക്കൂർ കർശന നിരീക്ഷണത്തിനു ശേഷം തുടർ ചികിത്സ വേണമെന്ന കാര്യത്തിൽ തീരുമാനമെടുക്കാനാണ് എം.ഒ.എസ്.സി മെഡിക്കൽബോർഡിന്റെ തീരുമാനം.
