വിശ്വാസം വികസനത്തിന് വഴിമാറി.റോഡിന് നടുവിലെ ഒറ്റപ്പന ചരിത്രമായി

തലമുറകള്‍ കൈമാറിവന്ന വിശ്വാസവും ഒരു നാടിന്റെ ചരിത്രവും വിസ്മൃതിയിലേയ്ക്ക് മറയുന്നത് കാണുവാൻ ആയിരക്കണക്കിനാളുകളാണ് കൂടിയത്.സംഭവം നടന്നത് ആലപ്പുഴയിലാണ്. ഹരിപ്പാട് കുരുട്ടൂര് ഭഗവത്രി ക്ഷേത്രത്തിലെ വിശ്വാസത്തിന്റെ ഭാ​ഗമായ പന മുറിക്കുന്നത് കാണാന്‍ രാവിലെ മുതല്‍ തന്നെ നാട്ടുകാര്‍ തടിച്ചുകൂടിയിരുന്നു.ദേശീയ പാതയിലൂടെ കടന്നുപോകുമ്പോള്‍ യാത്രക്കാരുടെ മനസിൽ എന്നും തങ്ങിനില്‍ക്കുന്ന ഒന്നായിരുന്നു കുരുട്ടൂര് ഭഗവത്രി ക്ഷേത്രത്തിന് മുന്നില്‍ തലയുയര്‍ത്തി നിന്നിരുന്ന പന.
ദേശീയപാതവികസനത്തിനായി സമീപത്തെ മുഴുവൻ മരങ്ങളും കെട്ടിടങ്ങളും മാറ്റിയപ്പോള്‍ വിശ്വാസികളുടെ അഭ്യര്‍ഥന കണക്കിലെടുത്ത് ഈ പന മാത്രം അധികൃതര്‍ മാറ്റിനിര്‍ത്തി. ഭഗവതിയുടെ ഉറ്റതോഴിയായ യക്ഷി വസിക്കുന്നത് ഈ പനയിലെന്നാണ് ഐതിഹ്യം. ക്ഷേത്രത്തിലെ ഉല്‍സവം കഴിയുന്നത് വരെ പന മുറിച്ച് മാറ്റരുതെന്ന വിശ്വാസികളുടെ അഭ്യര്‍ഥന പ്രകാരം അധികൃതര്‍ നീട്ടിവെക്കുകയായിരുന്നു.പൂരം ഉല്‍സവത്തിന് പള്ളിവേട്ട തുടങ്ങുന്നത് ഈ പനയുടെ ചുവട്ടില്‍ നിന്നാണ്. അതുകൊണ്ട് ഉല്‍സവം കഴിയുന്നത് വരെ മരം മുറിക്കരുതെന്നായിരുന്നു ആവശ്യം. മാത്രമല്ല, ഭഗവതിയുടെയും യക്ഷിയുടെയും അനുമതി വാങ്ങണം. ഒടുവിൽ ഉല്‍സവം സമാപിച്ച്, തന്ത്രിയുടെ മേല്‍നോട്ടത്തില്‍ പരിഹാരക്രിയകൾ കൂടി നടത്തിയ ശേഷമാണ് ഇപ്പോള്‍ മരം മുറിച്ചത്. അങ്ങനെ വിശ്വാസം വികസനത്തിന് വഴിമാറുന്നതിന് ഒരുദേശമാകെ സാക്ഷ്യം വഹിച്ചത് ചരിത്രത്താളുകളിൽ ഇടം പിടിയ്ക്കുമെന്നതിൽ സംശയമില്ല.